Batay Vètyè a se te dènye batay ki ta pral mennen ak liberasyon pèp nou an ki t ap goumen kont esklavaj. Jean Jacques Dessalines ansanm ak lame li a te kanpe pou yo te goumen kont youn nan pi gwo lame ki te gen nan epòk sa a, ki se te lame fransè Napoleon Bonaparte t ap dirije a.Yo te kanpe goumen pou di non kont tout fòs opresyon ki te vle mete anba pye dwa pèp nou an genyen pou li viv libelibè! 

221 lane aprè Ayiti ap travèse yon moman difisil kote anpil zòn nan peyi a viktim yon sitiyasyon ensekirite ak vyolans. Sitiyasyon sa akselere mank kèk bezwen debaz, anplis anpil wout pa aksesib. 

Sitiyasyon sa a menm rive afekte lekòl yo, kote anpil fwa timoun yo oblije pa ale lekòl akòz distans yo gen pou fè pou rive nan etablisman yo, wout ki bloke, oswa mank mwayen. Kòman nou kapab itilize egzanp Batay Vètyè a pou nou jwenn yon solisyon ak kriz sa a epi leve eskanp figi nou?

Listwa yon peyi se tankou yon gid ki montre l kote l soti ak ki kote li prale. Batay Vètyè a se non sèlman youn nan senbòl revolisyon an, men se moman zansèt yo te di non kont tout fòm dominasyon ak opresyon! Jodi a nou menm nan Anseye Pou Ayiti (APA) nou twouve nou nan kafou listwa kote n ap travay pou pote chanjman nan kominote yo. Pou nou kapab fè sa, nou ap ekipe Anseyan-Lidè, Paran-Lidè, Direktè-Lidè, Aprenan-Lidè – yon rezo Sitwayen-Lidè – ak bon jan zouti ki pral pèmèt yo vin ajan chanjman nan kominote kote y ap viv la.

Lidèchip transfòmasyonèl la se youn nan metòd APA kwè ki kapab ede nou atenn objektif nou yo. Sitwayen-Lidè yo travay kòt ak kòt ak manm kominote yo pou kreye yon demen miyò kote tout aprenan yo ap gen aksè ak edikasyon yon fason ekitab, kote tou anseyan yo ap resevwa bon jan fòmasyon pou sèvi peyi yo. 

Komemorasyon 221 lane Batay Vètyè sa a ta dwe yon moman refleksyon, kote nou pran tan pou nou reflechi ak sakrifis zansèt yo te fè pou nou te kapab lib – men tou kòman nou menm nou kapab kontribiye nan batay pou chanjman sa a ki ap kontinye jiskaprezan. Capois Lamort te di « Annavan, boulèt yo se pousyè! » Se vre jounen jodi a nou pa gen boulèt, men nou ap fè fas ak lòt kalite boulèt tankou inegalite, mank resous, elatriye. Se tout rezon sa yo ki fè APA ap travay ansanm ak kominote yo atravè yon ansanm pwogram pou rive atenn plis moun posib, epi ekipe Sitwayen-Lidè yo pou yon demen miyò.

APA envite tout moun vin pote kole nan mouvman pou chanjman sa a l ap mennen depi dis (10) lane. Jan pwovèb la di a: « Men anpil, chay pa lou. »  Nou bezwen tout moun nan konbit pou chanjman sa a. Vin pote kole!

Ane sa a nou ap komemore 221yèm lane Batay Vètyè ki te fèt 18 novanm 1803. Batay Vètyè a se te dènye batay ki ta pral mennen ak liberasyon pèp nou an ki t ap goumen kont esklavaj.

Kredi Foto: https://hadevolution.mondoblog.org/