Se poutèt sa a depi dis lane APA ap òganize yon ansanm aktivite kote li ap ekipe yon rezo lidè ki pral pote chanjman nan kominote yo. 

Men kèk fason espesyal APA ap ekipe rezo lidè sa a pou yo aji kòm modèl.

Devlopman Pwofesyonèl: nan APA nou kwè nan pataje konesans, pou sa rive fèt nou ekipe yon ansanm sitwayen atravè fowòm pedagojik nou òganize. Pou tout kowòt yo nou mete aksan sou devlopman pwofesyonèl ak kotchinn. Sitwayen-Lidè sa yo pral gen posibilite pou pataje konesans ak lòt manm nan kominote a.

Youn nan fason nou fè devlopman pwofesyonèl se lè nou pa rete nan domèn edikasyon sèlman. Pou rezon sa, APA te òganize yon aktivite kote Sitwayen-Lidè yo ta pral aprann fason pou bay premye-swen. Nan kontèks peyi ap viv kounye a li enpòtan pou manm kominote yo konnen teknik debaz ki kapab pèmèt yo sove lavi. Seyans sou premye swen pou Sitwayen-Lidè sa a te fèt nan objektif pou ede ekipe sitwayen konsekan ki pral sèvi peyi a. Aprè fòmasyon sa a Sitwayen-Lidè yo te ekipe ak bon jan zouti ki pral ede yo sèvi kominote yo.

Lidèchip Kolektif: nan APA nou kwè nan tèt ansanm. Nou kwè lè nou fòme plis moun ki konpetan se plis nou ap kapab jwenn rezilta ki pozitif. Moun sa yo ap kapab ale transfòme kominote kote y ap viv la.

Lidèchip transfòmasyonèl: lidèchip transfòmasyonèl la pèmèt nou devlope konpetans epi kreye yon mantalite ki diferan. Li pèmèt Sitwayen-Lidè yo pote yon chanjman reyèl epi patisipe nan devlopman kominote yo. APA gen yon gwo objektif ki se : fòme 50 000 Sitwayen-Lidè pou sèvi 4 milyon timoun ki gen ann Ayiti yo.

Valorizasyon kilti ak peyi nou: nou kwè kilti nou se idantite nou, pou rezon sa a aktivite nou òganize yo makonnen ak tout sa ki mete kilti peyi nou valè. Nou prezante sa ki fè fyète nou kòm pèp, epi fason nou kapab sèvi ak listwa pou chanje, oswa amelyore kote n ap viv la.

Pataje lajwa, selebre epi montre apresyasyon: nou kwè nou kapab chanje kominote yo, malgre moman ki difisil peyi a ap travèse a. Pou rive fè sa nou dwe travay ansanm. Manm kominote yo jwe yon gwo wòl nan sa a. APA ap travay pou ekipe lidè atravè kowòt li yo pou transfòme anviwònman, amelyore kalite edikasyon pou aprenan yo, ankouraje kolaborasyon epi simaye lajwa!

Depi dis lane APA ap travay avèk kominote yo pou pote chanjman, epi poze baz pou yon demen miyò kote tout timoun ap gen aksè ak edikasyon sanpatipri. Sitwayen-Lidè yo jwe yon gwo wòl nan travay sa a. Nou kwè se nan travay ansanm na rive fè sa. Vin pote kole nan mouvman sa a!